مدارتي..مدارتي.. من عبث بك يا مدارتي ؟؟

aae3

قطعوك من لجناب فوجه اللوز والحلاوتي

مدارتي يا مدارتي

الفرحة باينة على بُوكبٌُوط وشلى خَيٌاتي

ظنوا الناس ناعسين ولاهيين بالصيف والسهراتي

بغاو يلعبو خفيف ويضربوها طايرة فالسمواتي

أيييه يا وجدة تبكي وتكولي فين مشاو أولادي وبناتي

بُوكبٌُوط فرحانْ يديرْ ما بغى شُوفُو يا ساداتي

قالوا  زمان صياد نعام يلكاها يلكاها يا حضراتي

فينكم يا ناس وجدة فين النفخة والشهامة يا كياتي

مدارتي يا مدارتي

تبكي وتكولي فين المساحات الخضراء رجعوك مثل زلافة حريرة بلا شريحة ولا تمراتي

مدارتي يا مدارتي

هادوك دوروا ظهورهم ولوخرين غمضوا لعويناتي

بغاوها تكون سايبة وليهم دايمة وشخبط يا شخباتي

مدارتي يا مدارتي

هذا غي لي باين أما لي دارك يعلم به رب السمواتي

مدارتي يا مدارتي

لي علينا كولناه والباقي عليكم والسر يْبان ولو بعد السنواتي  .

المجدوبي

تعليقات الفيسبوك

التعليقات مغلقة